जगदंबा करणीजी रो आवाहऩ गीत कवि खेतसी मिसण रो कह्यो

अरज करुं सांभळे आव शगति अठे,गरज मुझ पडी छै एथ गाढी ।
अठै मां आवजे रुप थुं आवडां , देवीयां वडेरी देव डाढी॥१॥

जायबो प्रदेशां देशमां जेथमां , दाखवां रख्सा कर तेथ देवी ।
मनोरथ माहरां पुरण कर मावडी,सदैवां मेहासधू घणी सेवी ॥२॥

थाण देसाणमें थापणों थाहरो, माहरो वसीलो थुंज माता ।
भीड कट सेवगां हवे थुंज भुजाळी, विशाऴी ज़ांणती सरव वातां ॥३॥

डणकतौं केहरि चढैऩै डाढाऴी, चोजसूं साह्यता करे चंडी ।
भळेऴै कुंडऴां कांनमै भवानी, झऴेऴै हाररो तेज झुंडी ॥४॥

लोवडी शीशरे उपरां लखीजै,हाथ मैं डम्मरु आव हाली ।
झणंकै बिछिया पांवमै झांझरां, वडाळी पांथुंआं मात वाऴी ॥५॥

त्रशूऴां हाथमैं, खडग थुं तोलती ,बोलती हुंकारां होय बेली ।
कंचुऑ हिरांमण जडेनै कसेली,वसेली मरुधरां आव व्हेली ॥६॥

धमरोळ धूंपडां जगाडे धजाऴी,मायाऴी भेऴियो ओढ माथै ।
वाजडा ढोल रणतूर थुं वजाडे ,सजाडे जोगणी सरव साथै॥७॥

किलोऴां हास किवळासमै करंती,फरंती फूंदडी चोज फेरा ।
चोरासी चारणी नवेलख चंडीयां, डारणां दहितां तणां डेरा ॥८॥

सांवळां चरज्जां गावती शगत्ती,जगत्ती उपरां झुंड जामे।
अडेडै उडती वाट थुं अकाशां,सडेडै खेचरी साम-सामै॥९ ॥

ज़ोधपुर ,उदयपुर ,बीकांणां केतरा, मावडी थाहरा भूप ब्राजे ।
केतरा करुं वाखाण तौ किन्याणी,आई किरत वधण घणी आजै ॥१०॥

वदै जो करनला नाम थारो वडो, भुतडां, प्रेतडां दूर भागै।
धरै जो थाहरो रुप दिल कर धडै, लऴै जग तेहरे पाय लागै ॥११॥

एहडी वडी आई धरां उपरां,मोपरां वीशहथ धरे माता ।
धुरंधर काज मन करयां कर सिध्धजे, उराजे अमां पर विघन आतां ॥१२॥

दाणवां केतरा दुरजणां दऴे थुं,कडे कर माहरां सुकज केता ।
आशरो ईऴा पर आपरो अंबिका, जोराऴी मेटजो दोष जेता॥१३॥

दोय कर जोडनैं खेतसी दाखवै,अरज थुं सांभऴे आव अंबा ।
मेहासधू चारणां फतह कर मावडी, लोवडी प्रसारे हाथ लंबा ॥१४॥

देवी रा दूहा

चाळरायरे जाळरी, झाली सेवक़ झंव;
दिन वळियो टळियो विघन, आंगण फळियो अंब॥१॥

आवड ध्यायां विदगां,आवड कर आपांण;
कावड नें सावड करण,नावड विरद निवाण ॥२॥

सोह बखांणूं चारणी, मुरधर देश विचाळ;
सूरज किणी न ढांकियो, हेकण आवड टाळ॥३॥


आवड आवड उचरतां ,तावड लगे न ताव ।
छतराऴी छाया करै, मामडियाऴी माव

करनांदे कई वार, मन मांहि कीनो मतो,
(पण) हुकुम विनां हिक वार,देसांणो दीठो नही ॥४॥

आई किजै उंदरा,मेहाई गढ़ मांय ।
कणक चुगां कोठाररी,पड्यो रहुं पछडाय ॥५॥

जगदंबा रा प्रवाडा(आवडजी महाराज रो)-नरुजी कविया रो कहयो

उमा रुप अऩूप अवऩि, आवडां लखि आदि;

बरण चारण जनम बाढि,आप कीरति अऩादि;

तो अनऩादि जी अनऩादि ; अंबा अवतऱी अनऩादि ॥१॥

धऩ्य जैसलमेर धरती, गांव चाऴक़ गण्य;

साहेबां लख तणॊ सूरज मांमडां कवि मन्य;

तॊ धऩ्य जी हॉ धऩ्य, धाऱी देह उण धर धऩ्य ॥२॥

शक अठ्यासी आठसैं सुदि, चैत मास सुचारु;

नमुं शुम दिऩ तिथि ऩौमि,वरतियौ शऩिवार;

तॉ अवतार जी अवतार, आवड ईश्वरी अवतार ॥३॥

लांगलां पर आदि लॆकर, सगत बहऩां सात;

लॊक़ परथम जनम लीन्यॊ, मांमडां घर मात;

तो विख्यात जी विख्यात,वसुधा कीरति विख्यात॥४॥

तैमडो खळ मार त्रिपुरा, जीत असुरां जंग;

थिरु परबत मांहि थाप्यो, मात दुरगा मंढ;

तो नवखंड जी नवखंड,नामी आसती नवखंड॥५॥

सिंध जातां आप शगति, हाकडो महराण;

चळू हेकण घाल चंडी, षोशियो सुर त्राण;

तो अप्रमाण जी अप्रमाण,पी ग्यां आप जळ अप्रमाण ॥६॥

पीवणें अहि भ्रात पीधो, करी अद्भू्त कत्थ;

अमरलोंकांसुं आंण अमरत, रोडियो रवि रत्थ;

तो समरत्थ जी समरत्थ, सहोदर जीवाड्यो समरत्थ ॥७॥

आवडां रो सुजस अवनि, विलंब है विस्तार;
पात मुणिया कथा परचा सहज जुगत्यां सार;

तो साधार जी साधार, सगति सेवगां साधार॥८॥